na sah saka jab masafaton ke azab sare

na sah sakā jab masāfatoñ ke azaab saare

to kar ga.e kuuch merī āñkhoñ se ḳhvāb saare

bayāz-e-dil par ġhazal kī sūrat raqam kiye haiñ

tire karam bhī tire sitam bhī hisāb saare

bahār aa.ī hai tum bhī aao idhar se guzro

ki dekhnā chāhte haiñ tum ko gulāb saare

ye sāneha hai ki vā.izoñ se ulajh paḌe ham

ye vāqi.a hai ki pī rahe the sharāb saare

bhalā huā ham gunāhgāroñ ne zid nahīñ kī

sameT kar le gayā hai nāseh savāb saare

'farāz' kis ne mire muqaddar meñ likh diye haiñ

bas ek dariyā kī dostī meñ sarāb saare

na sah saka jab masafaton ke azab sare

to kar gae kuch meri aankhon se KHwab sare

bayaz-e-dil par ghazal ki surat raqam kiye hain

tere karam bhi tere sitam bhi hisab sare

bahaar aai hai tum bhi aao idhar se guzro

ki dekhna chahte hain tum ko gulab sare

ye saneha hai ki waizon se ulajh paDe hum

ye waqia hai ki pi rahe the sharab sare

bhala hua hum gunahgaron ne zid nahin ki

sameT kar le gaya hai naseh sawab sare

'faraaz' kis ne mere muqaddar mein likh diye hain

bas ek dariya ki dosti mein sarab sare