نہ سمجھ سکی جو دنیا یہ زبان بے زبانی

نہ سمجھ سکی جو دنیا یہ زبان بے زبانی

ترا چہرہ خود کہے گا مرے قتل کی کہانی

یہ عذاب آسمانی یہ عتاب ناگہانی

ہیں کہاں سمجھنے والے مرے آنسوؤں کو پانی

کہیں لٹ رہا ہے خرمن کہیں جل رہا ہے گلشن

اسے کس نے سونپ دی ہے یہ چمن کی پاسبانی

مری تجھ سے کیا ہے نسبت مرا تجھ سے واسطہ کیا

تو حریص لالہ و گل میں فدائے باغبانی

تجھے ناز حسن پر ہے مجھے ناز عشق پر ہے

ترا حسن چند روزہ مرا عشق جاودانی

یہ وہ دل ربا ہے دنیا مرے دوستو کہ جس کی

نہ کوئی ادا نئی ہے نہ کوئی ادا پرانی

کوئی اس سے کہہ دے اخترؔ ذرا ہوش میں وہ آئے

نہ رہے گا زندگی بھر یہ سرور شادمانی