na samjhe gul-ruKHon ke hum ishaare

na samjhe gul-ruḳhoñ ke ham ishāre

hameñ patthar na maare phuul maare

na dekhe apnī kashtī ne to kyā hai

sunā to hai ki hote haiñ kināre

ḳhulāsa 'umr bhar kī 'āshiqī kā

hamāre tum nahīñ ham haiñ tumhāre

mohabbat dostī hai dushmanoñ se

hue haiñ dil ke dushman dil ke pyāre

tumhīñ tum ho nahīñ kuchh bhī kahīñ aur

kahāñ tashbīh kaise isti'āre

sañvar jā.egā ḳhud hī nazm-e-‘ālam

koī pahle tire gesū sañvāre

dil-e-pur-soz-o-āh-e-ātishīñ se

nahiñ aañsū nahiñ haiñ jo sharāre

mohabbat fāteh-e-‘ālam hai lekin

mohabbat meñ vahī jiite jo haare

'zahīn' āhista kū-e-dost meñ chal

ki āsūda yahāñ haiñ chāñd taare

na samjhe gul-ruKHon ke hum ishaare

hamein patthar na mare phul mare

na dekhe apni kashti ne to kya hai

suna to hai ki hote hain kinare

KHulasa 'umr bhar ki 'ashiqi ka

hamare tum nahin hum hain tumhaare

mohabbat dosti hai dushmanon se

hue hain dil ke dushman dil ke pyare

tumhin tum ho nahin kuchh bhi kahin aur

kahan tashbih kaise isti'are

sanwar jaega KHud hi nazm-e-‘alam

koi pahle tere gesu sanware

dil-e-pur-soz-o-ah-e-atishin se

nahin aansu nahin hain jo sharare

mohabbat fateh-e-‘alam hai lekin

mohabbat mein wahi jite jo haare

'zahin' aahista ku-e-dost mein chal

ki aasuda yahan hain chand tare