na sar-nigun na ba-zahir udas udas chale

na sar-nigūñ na ba-zāhir udaas udaas chale

ajiib shaan se marne vafā-shanās chale

banā ke ḳhūgr-e-ehsās-e-dard-o-ġham-e-dil ko

hamāre paas se saare hujūm-e-yās chale

sunā ke ahl-e-junūñ ko bahār kā muzhda

havās vaale bhī ik samt bad-havās chale

hayāt naam hai aise safar kā ai hamdam

qadam qadam pe jahāñ fikr-e-ās-o-yās chale

zabāñ pe aa.e to Dar hai bane na afsāna

vo baat jis pe bahut har taraf qayās chale

hamārī dalq-navāzī pe rashk karne ko

sunā hai dair-o-haram se nazar-shanās chale

maza to jab hai bahāroñ kī faiz-o-baḳhshish kā

ki 'asr' jaam bhī be-arz-o-iltimās chale

na sar-nigun na ba-zahir udas udas chale

ajib shan se marne wafa-shanas chale

bana ke KHugr-e-ehsas-e-dard-o-gham-e-dil ko

hamare pas se sare hujum-e-yas chale

suna ke ahl-e-junun ko bahaar ka muzhda

hawas wale bhi ek samt bad-hawas chale

hayat nam hai aise safar ka ai hamdam

qadam qadam pe jahan fikr-e-as-o-yas chale

zaban pe aae to Dar hai bane na afsana

wo baat jis pe bahut har taraf qayas chale

hamari dalq-nawazi pe rashk karne ko

suna hai dair-o-haram se nazar-shanas chale

maza to jab hai bahaaron ki faiz-o-baKHshish ka

ki 'asr' jam bhi be-arz-o-iltimas chale