na sawal-e-jam na zikr-e-mai usi bankpan se chale gae

na savāl-e-jām na zikr-e-mai usī bāñkpan se chale ga.e

tirā zarf dekh ke tishna-lab tirī anjuman se chale ga.e

kabhī tū ne sochā bhī sub.h-e-nau ki tamām raat guzār ke

jinheñ Das ga.ī tirī raushnī vo kahāñ vatan se chale ga.e

mujhe dhun ki kākul-e-zindagī jo bikhar ga.ī hai sañvār duuñ

tumheñ ġham ki ishq ke tazkire mire sher-o-fan se chale ga.e

tire gesuoñ se aziiz thiiñ jinheñ kā.enāt kī uljhaneñ

tirā ġham sameT ke ruuh meñ tirī anjuman se chale ga.e

mire dil ko 'qaisar'-e-be-navā koī ġham shikast na de sakā

ki ulajh ke saikḌoñ hādse mire bāñkpan se chale ga.e

na sawal-e-jam na zikr-e-mai usi bankpan se chale gae

tera zarf dekh ke tishna-lab teri anjuman se chale gae

kabhi tu ne socha bhi subh-e-nau ki tamam raat guzar ke

jinhen Das gai teri raushni wo kahan watan se chale gae

mujhe dhun ki kakul-e-zindagi jo bikhar gai hai sanwar dun

tumhein gham ki ishq ke tazkire mere sher-o-fan se chale gae

tere gesuon se aziz thin jinhen kaenat ki uljhanen

tera gham sameT ke ruh mein teri anjuman se chale gae

mere dil ko 'qaisar'-e-be-nawa koi gham shikast na de saka

ki ulajh ke saikDon hadse mere bankpan se chale gae