na shabistan hai na ab sham-e-shabistan koi

na shabistāñ hai na ab sham-e-shabistāñ koī

ghar kā ye haal hai jaise ho bayābāñ koī

ban ke paikāñ rahe aisā nahīñ armāñ koī

ban ke armāñ rahe aisā nahīñ paikāñ koī

hai shab-e-vasl kahāñ haa.e ye kāfir-andāz

ho rahā hai mirī chheḌoñ se pareshāñ koī

jaan paḌ jaa.e mirī ārzū-e-murda meñ

jhūTā-sachchā lab-e-jāñ-baḳhsh se paimāñ koī

na uThūñ dil meñ liye yād-e-sitam hashr ke din

is adā se sar-e-turbat hai pashemāñ koī

kah ga.e niiñd ga.ī raat kā ārām gayā

us kī taqdīr jo ho aap kā mehmāñ koī

sharar-e-sañg se achchhī hai parī shīshe kī

un butoñ kā na bane banda-e-ehsāñ koī

kisī jañgal meñ base jā ke galī se terī

nazar aatā nahīñ ab chāk-e-garebāñ koī

jhāñkne ko idhar aa.ī na kabhī bād-e-bahār

jab se ham aa.e na aayā sū-e-zindāñ koī

chhū ga.ī gosha-e-dāman se to chhā jā.egī

ḳhaak se merī bachā.e hue dāmāñ koī

ġhair ke sar kī qasam hañs ke dam-e-va.ada-e-vasl

ai maiñ sadqe tire kyā ye bhī hai āsāñ koī

gul kutar jaa.e koī pā-e-hinā.ī se zarā

mere madfan ko banā jaa.e gulistāñ koī

raheñ sone meñ laTeñ zulfoñ kī yūñhī ruḳh par

na haTā.e na chhue zulf-e-pareshāñ koī

baat rah jaa.e mirī us ke gunahgāroñ meñ

na bache nāma-e-a.amāl se isyāñ koī

duḳht-e-raz ko na ziyāñ dī na kabhī tauba kī

ahd nāseh se na paimāne se paimāñ koī

le jabīñ ke koī bose na kahīñ sote meñ

chun na le hoñThoñ se sab aap ke afshāñ koī

ubhre joban ke liye aap ko āḳhir na milā

ḳham-e-gardan ke sivā aur nigahbāñ koī

jo jalātā hai mujhe us se evaz lene ko

de de ik chāñd kā TukḌā shab-e-hijrāñ koī

ghar kā kyā zikr hai ham dil meñ uThā kar rakh leñ

ham ko mil jaa.e jo chhoTā sā bayābāñ koī

aarsī aa.ina ab donoñ nazar se utre

dil-e-hairāñ hai koī dīda-e-hairāñ koī

duur se kyā nigah-e-shauq ne chheḌā hai unheñ

apnī zulfoñ kī tarah kyuuñ hai pareshāñ koī

hashr ke roz rahe lutf-e-shab-e-vasl 'riyāz'

āqibat ke liye ab chāhiye sāmāñ koī

na shabistan hai na ab sham-e-shabistan koi

ghar ka ye haal hai jaise ho bayaban koi

ban ke paikan rahe aisa nahin arman koi

ban ke arman rahe aisa nahin paikan koi

hai shab-e-wasl kahan hae ye kafir-andaz

ho raha hai meri chheDon se pareshan koi

jaan paD jae meri aarzu-e-murda mein

jhuTa-sachcha lab-e-jaan-baKHsh se paiman koi

na uThun dil mein liye yaad-e-sitam hashr ke din

is ada se sar-e-turbat hai pasheman koi

kah gae nind gai raat ka aaram gaya

us ki taqdir jo ho aap ka mehman koi

sharar-e-sang se achchhi hai pari shishe ki

un buton ka na bane banda-e-ehsan koi

kisi jangal mein base ja ke gali se teri

nazar aata nahin ab chaak-e-gareban koi

jhankne ko idhar aai na kabhi baad-e-bahaar

jab se hum aae na aaya su-e-zindan koi

chhu gai gosha-e-daman se to chha jaegi

KHak se meri bachae hue daman koi

ghair ke sar ki qasam hans ke dam-e-wada-e-wasl

ai main sadqe tere kya ye bhi hai aasan koi

gul kutar jae koi pa-e-hinai se zara

mere madfan ko bana jae gulistan koi

rahen sone mein laTen zulfon ki yunhi ruKH par

na haTae na chhue zulf-e-pareshan koi

baat rah jae meri us ke gunahgaron mein

na bache nama-e-amal se isyan koi

duKHt-e-raz ko na ziyan di na kabhi tauba ki

ahd naseh se na paimane se paiman koi

le jabin ke koi bose na kahin sote mein

chun na le honThon se sab aap ke afshan koi

ubhre joban ke liye aap ko aaKHir na mila

KHam-e-gardan ke siwa aur nigahban koi

jo jalata hai mujhe us se ewaz lene ko

de de ek chand ka TukDa shab-e-hijran koi

ghar ka kya zikr hai hum dil mein uTha kar rakh len

hum ko mil jae jo chhoTa sa bayaban koi

aarsi aaina ab donon nazar se utre

dil-e-hairan hai koi dida-e-hairan koi

dur se kya nigah-e-shauq ne chheDa hai unhen

apni zulfon ki tarah kyun hai pareshan koi

hashr ke roz rahe lutf-e-shab-e-wasl 'riyaz'

aaqibat ke liye ab chahiye saman koi