na socha ye bhi qatil ne ki us bewa ka kya hoga

na sochā ye bhī qātil ne ki us beva kā kyā hogā

jise ye aas thī ik din mirā beTā baḌā hogā

agarche dekhne meñ mere qad se baḌh gayā hogā

mirā saaya magar mere hī qadmoñ par girā hogā

chalo chal kar javānī kī kuñvārī laash par ro leñ

kisī muflis kī beTī kā janāza uTh rahā hogā

salīboñ ke safar meñ hai tabassum jis ke hoñToñ par

vo insāñ intihā-e-ġham se pāgal ho chukā hogā

vo ho saktā hai qātil kab yaqīñ aa.egā logoñ ko

hamārā ḳhuun us ke haath meñ rang-e-hinā hogā

maiñ jismoñ kī numā.ish-gāh meñ kyā dekhne jā.ūñ

ki us ne har badan par apnā chehra rakh diyā hogā

bahut hassās thā ik shaḳhs jis ne ḳhud-kushī kar lī

kisī aḳhbār meñ shāyad ye tum ne bhī paḌhā hogā

guzārī pattharoñ ke shahr meñ kyoñ zindagī us ne

ye socho kis qadar majbūr āḳhir aa.ina hogā

diye rakhte chalo ai 'badr' palkoñ kī muñDeroñ par

añdherī raat meñ āñkhoñ kā darvāza khulā hogā

na socha ye bhi qatil ne ki us bewa ka kya hoga

jise ye aas thi ek din mera beTa baDa hoga

agarche dekhne mein mere qad se baDh gaya hoga

mera saya magar mere hi qadmon par gira hoga

chalo chal kar jawani ki kunwari lash par ro len

kisi muflis ki beTi ka janaza uTh raha hoga

salibon ke safar mein hai tabassum jis ke honTon par

wo insan intiha-e-gham se pagal ho chuka hoga

wo ho sakta hai qatil kab yaqin aaega logon ko

hamara KHun us ke hath mein rang-e-hina hoga

main jismon ki numaish-gah mein kya dekhne jaun

ki us ne har badan par apna chehra rakh diya hoga

bahut hassas tha ek shaKHs jis ne KHud-kushi kar li

kisi aKHbar mein shayad ye tum ne bhi paDha hoga

guzari pattharon ke shahr mein kyon zindagi us ne

ye socho kis qadar majbur aaKHir aaina hoga

diye rakhte chalo ai 'badr' palkon ki munDeron par

andheri raat mein aankhon ka darwaza khula hoga