na sune jab koi fariyaad to fariyaad na kar

na sune jab koī fariyād to fariyād na kar

izzat-e-nafs baḌī chiiz hai barbād na kar

shikva-e-jaur-o-taġhāful dil-e-nāshād na kar

vo tujhe bhuul gayā tū bhī use yaad na kar

dam nikaltā hai nikal jaa.e balā se bulbul

āshiyāne ke liye minnat-e-sayyād na kar

khīñch kar muñh se zabāñ toḌ ke donoñ baazū

yuuñ to sayyād giraftār ko āzād na kar

ham vafā-kesh vafādār raheñge lekin

ai jafā-kosh jafā kar magar ījād na kar

bāġhbāñ kaash kahe fasl-e-ḳhizāñ se itnā

daulat-e-husn-e-ḳhudā-dād ko barbād na kar

aap ke ḳhauf haiñ be-laus haiñ jab banda-navāz

phir ye kyoñ kahte haiñ 'shāġhil' se ki fariyād na kar

na sune jab koi fariyaad to fariyaad na kar

izzat-e-nafs baDi chiz hai barbaad na kar

shikwa-e-jaur-o-taghaful dil-e-nashad na kar

wo tujhe bhul gaya tu bhi use yaad na kar

dam nikalta hai nikal jae bala se bulbul

aashiyane ke liye minnat-e-sayyaad na kar

khinch kar munh se zaban toD ke donon bazu

yun to sayyaad giraftar ko aazad na kar

hum wafa-kesh wafadar rahenge lekin

ai jafa-kosh jafa kar magar ijad na kar

baghban kash kahe fasl-e-KHizan se itna

daulat-e-husn-e-KHuda-dad ko barbaad na kar

aap ke KHauf hain be-laus hain jab banda-nawaz

phir ye kyon kahte hain 'shaghil' se ki fariyaad na kar