نہ سنے جب کوئی فریاد تو فریاد نہ کر

نہ سنے جب کوئی فریاد تو فریاد نہ کر

عزت نفس بڑی چیز ہے برباد نہ کر

شکوۂ جور و تغافل دل ناشاد نہ کر

وہ تجھے بھول گیا تو بھی اسے یاد نہ کر

دم نکلتا ہے نکل جائے بلا سے بلبل

آشیانے کے لئے منت صیاد نہ کر

کھینچ کر منہ سے زباں توڑ کے دونوں بازو

یوں تو صیاد گرفتار کو آزاد نہ کر

ہم وفا کیش وفادار رہیں گے لیکن

اے جفا کوش جفا کر مگر ایجاد نہ کر

باغباں کاش کہے فصل خزاں سے اتنا

دولت حسن خداداد کو برباد نہ کر

آپ کے خوف ہیں بے لوث ہیں جب بندہ نواز

پھر یہ کیوں کہتے ہیں شاغلؔ سے کہ فریاد نہ کر