na sunne mein na kahin dekhne mein aaya hai

na sunñe meñ na kahīñ dekhne meñ aayā hai

jo hijr o vasl mire tajribe meñ aayā hai

na.e sire se jal uTThī hai phir purānī aag

ajiib lutf tujhe bhūlne meñ aayā hai

na haath mere na āñkheñ mirī na chehra mirā

ye kis kā aks mire aa.ine meñ aayā hai

javāz rakhtā hai har ek apne hone kā

yahāñ pe jo hai kisī silsile meñ aayā hai

hai vāqi.a hadaf-e-sail-e-āb thā koī aur

mirā makān to bas rāste meñ aayā hai

vo rāz-e-vasl thā jo niiñd meñ khulā mujh par

ye ḳhvāb-e-hijr hai jo jāgte meñ aayā hai

'jamāl' dekh ke jiitā thā jo kabhī tujh ko

kahīñ vo shaḳhs bhī kyā dekhne meñ aayā hai

na sunne mein na kahin dekhne mein aaya hai

jo hijr o wasl mere tajribe mein aaya hai

nae sire se jal uTThi hai phir purani aag

ajib lutf tujhe bhulne mein aaya hai

na hath mere na aankhen meri na chehra mera

ye kis ka aks mere aaine mein aaya hai

jawaz rakhta hai har ek apne hone ka

yahan pe jo hai kisi silsile mein aaya hai

hai waqia hadaf-e-sail-e-ab tha koi aur

mera makan to bas raste mein aaya hai

wo raaz-e-wasl tha jo nind mein khula mujh par

ye KHwab-e-hijr hai jo jagte mein aaya hai

'jamal' dekh ke jita tha jo kabhi tujh ko

kahin wo shaKHs bhi kya dekhne mein aaya hai