na surat kahin shadmani ki dekhi

na sūrat kahīñ shādmānī kī dekhī

bahut sair duniyā-e-fānī kī dekhī

mirī chashm-e-ḳhūñ-bār meñ ḳhuub rah kar

bahār aap ne gul-fishānī kī dekhī

tamannā ne us rū-e-zebā ko dekhā

ki tasvīr husn-e-javānī kī dekhī

ajab shauq se dast-e-sāqī meñ ham ne

surāhī mai-e-arġhavānī kī dekhī

zahe rob-e-husn un ke dar par kisī ne

zarūrat na kuchh pāsbānī kī dekhī

na tum sā ḳhush-aḳhlāq paayā na ham ne

kahīñ shaan ye dil-sitānī kī dekhī

mujhe kar ke māyūs bole vo 'hasrat'

masarrat ġham-e-jāvedānī kī dekhī

na surat kahin shadmani ki dekhi

bahut sair duniya-e-fani ki dekhi

meri chashm-e-KHun-bar mein KHub rah kar

bahaar aap ne gul-fishani ki dekhi

tamanna ne us ru-e-zeba ko dekha

ki taswir husn-e-jawani ki dekhi

ajab shauq se dast-e-saqi mein hum ne

surahi mai-e-arghawani ki dekhi

zahe rob-e-husn un ke dar par kisi ne

zarurat na kuchh pasbani ki dekhi

na tum sa KHush-aKHlaq paya na hum ne

kahin shan ye dil-sitani ki dekhi

mujhe kar ke mayus bole wo 'hasrat'

masarrat gham-e-jawedani ki dekhi