na tare afshan na kahkashan hai namuna hansti hui jabin ka

na taare afshāñ na kahkashāñ hai namūna hañstī huī jabīñ kā

khulā hai parcham gaḌā hai jhanDā falak par us āh-e-ātishīñ kā

rahe haiñ ghul-mil ke kaise donoñ ye ek haiñ dil ke kaise donoñ

chhuTā jo ham se kisī kā dāman to saath hai ashk-o-ātshīñ kā

jo ek ho to ham us ko ro.eñ hue haiñ dushman badan ke ro.eñ

hameñ to har tār-e-āstīñ par gumān hai mār-e-āstīñ kā

jo rañg un kā badal chalā hai to shauq ab hai na valvala hai

bahut hī nāzuk muāmla hai visāl-e-ma.ashūq-e-nāznīñ kā

chaḌhī hai kachche ghaḌe kī aisī bañdhī hai ye dhun hameñ bhī saaqī

chakhā.eñ vaa.iz ko aaj ham bhī zarā mazā shahad-o-añgbīñ kā

tumhāre inkār ne chubho.e hamāre dil meñ hazāroñ nashtar

tum aise nāzuk ki naqsh ban kar rahā laboñ par nishāñ nahīñ kā

jo chhīñTeñ uḌ kar paḌīñ ḳhudāyā vo aur mahshar kareñgī barpā

hai merī gardan par aur ulTā ye ḳhuun qātil kī āstīñ kā

kalī na dāman kī muskurā.e na āstīñ terī gul khilā.e

maiñ sadqe qātil na rañg laa.e ye ḳhuun dāman kā āstīñ kā

'riyāz' ma.ashūq-e-māh-paikar koī na koī hai jalva-gustar

ki shaam aa.ī hai jo mire ghar vo chāñd laa.ī hai chaudhvīñ kā

na tare afshan na kahkashan hai namuna hansti hui jabin ka

khula hai parcham gaDa hai jhanDa falak par us aah-e-atishin ka

rahe hain ghul-mil ke kaise donon ye ek hain dil ke kaise donon

chhuTa jo hum se kisi ka daman to sath hai ashk-o-atshin ka

jo ek ho to hum us ko roen hue hain dushman badan ke roen

hamein to har tar-e-astin par guman hai mar-e-astin ka

jo rang un ka badal chala hai to shauq ab hai na walwala hai

bahut hi nazuk muamla hai visal-e-mashuq-e-naznin ka

chaDhi hai kachche ghaDe ki aisi bandhi hai ye dhun hamein bhi saqi

chakhaen waiz ko aaj hum bhi zara maza shahad-o-angbin ka

tumhaare inkar ne chubhoe hamare dil mein hazaron nashtar

tum aise nazuk ki naqsh ban kar raha labon par nishan nahin ka

jo chhinTen uD kar paDin KHudaya wo aur mahshar karengi barpa

hai meri gardan par aur ulTa ye KHun qatil ki aastin ka

kali na daman ki muskurae na aastin teri gul khilae

main sadqe qatil na rang lae ye KHun daman ka aastin ka

'riyaz' mashuq-e-mah-paikar koi na koi hai jalwa-gustar

ki sham aai hai jo mere ghar wo chand lai hai chaudhwin ka