na teri shakl se waqif na teri bas se log

na terī shakl se vāqif na terī baas se log

shanāḳht kaise kareñge tujhe qayās se log

kise ḳhabar thī ki rāheñ qadam jakaḌ leñgī

chale the tere tajassus meñ kitnī aas se log

na koī tuf kā Tahokā na tanz ke patthar

takā kiye mujhe kyoñ aaj bad-havās se log

ye ghar bhī merā hai is kī tamām chīzeñ bhī

har ek goshe meñ lekin ye nā-shanās se log

sunā ye hai ki payambar haiñ daur-e-zarrīñ ke

dhuāñ dhuāñ sā ye māhaul udaas udaas se log

na jaane bo'd ne kyā kyā banā diyā thā unheñ

mirā hī 'aks the dekhe jo maiñ ne paas se log

hazārhā mah-o-ḳhurshīd haath pakḌeñge

bhaTak na jaa.eñ ḳhalā meñ ye bad-havās se log

ḳhud āgahī inheñ aisā banā ga.ī varna

the nā-shanās na 'hairat' ye nā-shanās se log

na teri shakl se waqif na teri bas se log

shanaKHt kaise karenge tujhe qayas se log

kise KHabar thi ki rahen qadam jakaD lengi

chale the tere tajassus mein kitni aas se log

na koi tuf ka Tahoka na tanz ke patthar

taka kiye mujhe kyon aaj bad-hawas se log

ye ghar bhi mera hai is ki tamam chizen bhi

har ek goshe mein lekin ye na-shanas se log

suna ye hai ki payambar hain daur-e-zarrin ke

dhuan dhuan sa ye mahaul udas udas se log

na jaane bo'd ne kya kya bana diya tha unhen

mera hi 'aks the dekhe jo main ne pas se log

hazarha mah-o-KHurshid hath pakDenge

bhaTak na jaen KHala mein ye bad-hawas se log

KHud aagahi inhen aisa bana gai warna

the na-shanas na 'hairat' ye na-shanas se log