na tez-rau the na joinda-e-maqam the hum

na tez-rau the na joinda-e-maqām the ham

vo ham-safar thā to kaise sabā-ḳhirām the ham

hujūm-e-sañg meñ kyā ho suḳhan-tarāz koī

vo ham-suḳhan thā to kyā kyā na ḳhush-kalām the ham

bahut qarīb se dekhe jo us ke lab to khulā

ki ek umr se kyuuñ itne tishna-kām the ham

vo saarā daur thā rusvā.iyoñ se pahle kā

ki shahr-yār the yāroñ meñ nek-nām the ham

ye mehrbānī bhī ham pe rahī mohabbat kī

ki ḳhaas rahte hue bhī bahut hī aam the ham

visāl kā koī imkān hī na thā 'ḳhāvar'

vo zar-nigār-e-sahar thā ġhubār-e-shām the ham

na tez-rau the na joinda-e-maqam the hum

wo ham-safar tha to kaise saba-KHiram the hum

hujum-e-sang mein kya ho suKHan-taraaz koi

wo ham-suKHan tha to kya kya na KHush-kalam the hum

bahut qarib se dekhe jo us ke lab to khula

ki ek umr se kyun itne tishna-kaam the hum

wo sara daur tha ruswaiyon se pahle ka

ki shahr-yar the yaron mein nek-nam the hum

ye mehrbani bhi hum pe rahi mohabbat ki

ki KHas rahte hue bhi bahut hi aam the hum

visal ka koi imkan hi na tha 'KHawar'

wo zar-nigar-e-sahar tha ghubar-e-sham the hum