نہ تھے رنج و الم آہ و فغاں کل شب جہاں میں تھا

نہ تھے رنج و الم آہ و فغاں کل شب جہاں میں تھا

بہاریں تھیں نہ تھا خوف خزاں کل شب جہاں میں تھا

جہان ثابت و سیار تھا گرد سفر میری

مرے زیر قدم تھی کہکشاں کل شب جہاں میں تھا

پری پیکر نگارے سرو قدے لالہ رخسارے

حسیں اک اک سے بڑھ کر تھے وہاں کل شب جہاں میں تھا

مؤدب صف بہ صف کروبیاں تعظیم دیتے تھے

سریر آرا تھے شاہ دو جہاں کل شب جہاں میں تھا

عطائے اہل دل ہے اس کو اہل دل سمجھتے تھے

میں پہنچا کس طرح کیسے وہاں کل شب جہاں میں تھا