na to dil ka na jaan ka daftar hai

na to dil kā na jaañ kā daftar hai

zindagī ik ziyāñ kā daftar hai

paḌh rahā huuñ maiñ kāġhzāt-e-vajūd

aur nahīñ aur haañ kā daftar hai

koī soche to soz-e-karb-e-jāñ

saarā daftar gumāñ kā daftar hai

ham meñ se koī to kare isrār

ki zamīñ āsmāñ kā daftar hai

hijr ta.atīl-e-jism-o-jāñ hai miyāñ

vasl jism aur jaañ kā daftar hai

vo jo daftar hai āsmānī-tar

vo miyāñ jī yahāñ kā daftar hai

hai jo būd-o-nabūd kā daftar

āḳhirash ye kahāñ kā daftar hai

jo haqīqat hai dam-ba-dam kī yaad

vo to ik dāstāñ kā daftar hai

ho rahā hai guzishtagāñ kā hisāb

aur ā.indagāñ kā daftar hai

na to dil ka na jaan ka daftar hai

zindagi ek ziyan ka daftar hai

paDh raha hun main kaghzat-e-wajud

aur nahin aur han ka daftar hai

koi soche to soz-e-karb-e-jaan

sara daftar guman ka daftar hai

hum mein se koi to kare israr

ki zamin aasman ka daftar hai

hijr tatil-e-jism-o-jaan hai miyan

wasl jism aur jaan ka daftar hai

wo jo daftar hai aasmani-tar

wo miyan ji yahan ka daftar hai

hai jo bud-o-nabud ka daftar

aaKHirash ye kahan ka daftar hai

jo haqiqat hai dam-ba-dam ki yaad

wo to ek dastan ka daftar hai

ho raha hai guzishtagan ka hisab

aur aaindagan ka daftar hai