na to dosti na to dushmani nahi dil mein koi ghubar hai

na to dostī na to dushmanī nahī dil meñ koī ġhubār hai

vo ġhazab ke tiir kidhar ke the ki tamām sīna-figār hai

na shafaq kā rang na bū-e-gul na faroġh-e-sub.h-e-bahār hai

tire rang-o-rūp kā sehr hai jo fazāoñ meñ ye nikhār hai

jo nazar meñ aaya chamak gayā jise chhū liyā vo mahak gayā

yahī tarz-e-husn-e-ḳhisāl hai jo zamāna us pe nisār hai

koī gard-e-rāh-e-butāñ banā koī rashk-e-hūr-e-jināñ banā

koī shāhkār-e-jahāñ banā yahī ek musht-e-ġhubār hai

jo ziyā-fashāñ hai nazar nazar vo kahāñ mile ye nahīñ ḳhabar

mire dil meñ hai vahī sar-basar na to barq hai na sharār hai

vo ghuTan hai aaj fazāoñ meñ ki sharāb meñ bhī mazā nahīñ

na guloñ pe rang-e-shabāb hai na to naġhma-zan vo hazār hai

mire ishq kī haiñ karāmateñ ki huī haiñ terī navāzisheñ

tirī zulf kī sī mahak liye mire gird kaisā hisār hai

na qiyām meñ na sujūd meñ na to lutf jām-o-surūd meñ

ye hai zindagī koī zindagī na to qaid hai na farār hai

vo junūn-e-ishq hai mo'atabar jo tapā ho lail-o-nahār kā

na talāsh ho kisī chhāñv kī na sukūñ meñ us ko qarār hai

ġham-e-zindagī kahāñ sab milā yahī māniye ki vo kam milā

ki 'nazīr' qaid-e-hayāt meñ kahāñ ranj-o-ġham kā shumār hai

na to dosti na to dushmani nahi dil mein koi ghubar hai

wo ghazab ke tir kidhar ke the ki tamam sina-figar hai

na shafaq ka rang na bu-e-gul na farogh-e-subh-e-bahaar hai

tere rang-o-rup ka sehr hai jo fazaon mein ye nikhaar hai

jo nazar mein aaya chamak gaya jise chhu liya wo mahak gaya

yahi tarz-e-husn-e-KHisal hai jo zamana us pe nisar hai

koi gard-e-rah-e-butan bana koi rashk-e-hur-e-jinan bana

koi shahkar-e-jahan bana yahi ek musht-e-ghubar hai

jo ziya-fashan hai nazar nazar wo kahan mile ye nahin KHabar

mere dil mein hai wahi sar-basar na to barq hai na sharar hai

wo ghuTan hai aaj fazaon mein ki sharab mein bhi maza nahin

na gulon pe rang-e-shabab hai na to naghma-zan wo hazar hai

mere ishq ki hain karamaten ki hui hain teri nawazishen

teri zulf ki si mahak liye mere gird kaisa hisar hai

na qiyam mein na sujud mein na to lutf jam-o-surud mein

ye hai zindagi koi zindagi na to qaid hai na farar hai

wo junun-e-ishq hai mo'atabar jo tapa ho lail-o-nahaar ka

na talash ho kisi chhanw ki na sukun mein us ko qarar hai

gham-e-zindagi kahan sab mila yahi maniye ki wo kam mila

ki 'nazir' qaid-e-hayat mein kahan ranj-o-gham ka shumar hai