نہ تو مے سے نہ جام سے خم سے

نہ تو مے سے نہ جام سے خم سے

بن گئی بات اک تصادم سے

تم مجھے بھی کبھی صدا دو گے

یہ توقع نہ تھی کبھی تم سے

کچھ نہ کچھ داد مل گئی اس کو

پڑھتا ہے جو غزل ترنم سے

مرنے والا بھی بچ گیا آخر

آپ کے صرف اک تبسم سے

کیا تمنا کرے وہ ساحل کی

کھیلتا ہے جو خود تلاطم سے

عشق کے زہر کا جو عادی ہو

خوف کیا اس کو زہر کژدم سے

جن کو حاصل تھیں دائمی خوشیاں

کس لئے آج ہیں وہ گم سم سے

موت سے پہلے مر چکے کتنے

خوف سے یا کسی توہم سے

غرق بیڑے ہوئے ہیں باطل کے

عزم خاکیؔ کے جوش قلزم سے