na uske dil mein dhaDakne ka yar soch abhi

na us ke dil meñ dhaḌakne kā yaar soch abhī

ki pattharoñ meñ na paidā huā hai loch abhī

sisak sisak ke guzartā hai is liye jīvan

paḌī huī hai dam-e-zindagī ko moch abhī

jo ḳhush-nasīb haiñ un kī taraf na aañkh uThā

ai bad-nasīb tū apnā badan hī noch abhī

karegā kaun mohabbat kī aarzū ki yahāñ

har ek jism se lipTe haiñ cockroach abhī

kisī ke dard kā dil meñ charāġh raushan kar

jamī haiñ zehn meñ jo nafrateñ kharoch abhī

na āñkheñ miich ke duniyā kī rahguzar pe chalo

ravāñ-davāñ hai agar zindagī kī coach abhī

zamīn-e-ishq pe utrā hai 'āftāb' sadā

so bāzuoñ meñ yahī hiddateñ daboch abhī

na us ke dil mein dhaDakne ka yar soch abhi

ki pattharon mein na paida hua hai loch abhi

sisak sisak ke guzarta hai is liye jiwan

paDi hui hai dam-e-zindagi ko moch abhi

jo KHush-nasib hain un ki taraf na aankh uTha

ai bad-nasib tu apna badan hi noch abhi

karega kaun mohabbat ki aarzu ki yahan

har ek jism se lipTe hain cockroach abhi

kisi ke dard ka dil mein charagh raushan kar

jami hain zehn mein jo nafraten kharoch abhi

na aankhen mich ke duniya ki rahguzar pe chalo

rawan-dawan hai agar zindagi ki coach abhi

zamin-e-ishq pe utra hai 'aftab' sada

so bazuon mein yahi hiddaten daboch abhi