na wasl mein hai sukun aur na intizar mein hai

na vasl meñ hai sukūñ aur na intizār meñ hai

ajiib tarah kī afsurdagī bahār meñ hai

ta.alluqāt kashīda hue to mujh pe khulā

ki zā.iqoñ kā taġhayyur nigāh-e-yār meñ hai

maiñ kirchiyoñ kī tarah TūTtā hī rahtā huuñ

mirā vajūd abhī ranj-e-be-ḳhumār meñ hai

judā.iyoñ kī aziyyat bhī dhyān meñ rakhnā

maiñ māntā huuñ ye manzar abhī ġhubār meñ hai

ye zahr merī ragoñ meñ ravāñ hai sadiyoñ se

mire vajūd kī takmīl intishār meñ hai

'nazīr' apnī tabī.at pe jabr kartā huuñ

yahī to hai jo faqat mere iḳhtiyār meñ hai

na wasl mein hai sukun aur na intizar mein hai

ajib tarah ki afsurdagi bahaar mein hai

talluqat kashida hue to mujh pe khula

ki zaiqon ka taghayyur nigah-e-yar mein hai

main kirchiyon ki tarah TuTta hi rahta hun

mera wajud abhi ranj-e-be-KHumar mein hai

judaiyon ki aziyyat bhi dhyan mein rakhna

main manta hun ye manzar abhi ghubar mein hai

ye zahr meri ragon mein rawan hai sadiyon se

mere wajud ki takmil intishaar mein hai

'nazir' apni tabiat pe jabr karta hun

yahi to hai jo faqat mere iKHtiyar mein hai