na wo hijr mein rahin talKHiyan na wo lazzaten hain visal mein

na vo hijr meñ rahīñ talḳhiyāñ na vo lazzateñ haiñ visāl meñ

na guzar tirā mire ḳhvāb meñ na maiñ gum huuñ tere ḳhayāl meñ

na tirī adā meñ vo dilkashī na mirī ġhazal meñ vo tāzgī

vo ġhubār-e-vaqt meñ dab ga.ī jo kashish thī husn-o-jamāl meñ

maiñ tirī jafā se ḳhafā nahīñ mujhe tujh se koī gila nahīñ

mujhe fikr kyā hai ma.aal kī tujhe kyā milā hai vabāl meñ

na vo āh-e-ġham na vo chashm-e-nam na vo laġhzisheñ haiñ qadam qadam

na vo kashmakash hai javāb meñ na vo valvale haiñ savāl meñ

mujhe koī fikr-e-asās hai na ḳhayāl-e-hosh-o-havās hai

dam-e-zindagī kā hirās hai na tamīz hai mah-o-sāl meñ

na wo hijr mein rahin talKHiyan na wo lazzaten hain visal mein

na guzar tera mere KHwab mein na main gum hun tere KHayal mein

na teri ada mein wo dilkashi na meri ghazal mein wo tazgi

wo ghubar-e-waqt mein dab gai jo kashish thi husn-o-jamal mein

main teri jafa se KHafa nahin mujhe tujh se koi gila nahin

mujhe fikr kya hai maal ki tujhe kya mila hai wabaal mein

na wo aah-e-gham na wo chashm-e-nam na wo laghzishen hain qadam qadam

na wo kashmakash hai jawab mein na wo walwale hain sawal mein

mujhe koi fikr-e-asas hai na KHayal-e-hosh-o-hawas hai

dam-e-zindagi ka hiras hai na tamiz hai mah-o-sal mein