na wo nalon ki shorish hai na ghul hai aah-o-zari ka

na vo nāloñ kī shorish hai na ġhul hai āh-o-zārī kā

vo ab pahlā sā hañgāma nahīñ hai be-qarārī kā

talab kaisī bulānā kyā vahāñ ḳhud jā pahuñchte haiñ

agar aalam yahī chande rahā be-aḳhtyārī kā

vahāñ vo nāz-o-ishve se qadam gin gin ke rakhte haiñ

yahāñ is muntazir kā vaqt pahuñchā dam-shumārī kā

kabhī chashm-e-ḳhumār-ālūd kī mastī nahīñ dekhī

bajā hai hazrat-e-nāseh ko da.avā hoshiyārī kā

bhalā kyā aisī rotī shakl paas aa kar koī baiThe

uThe āḳhir vo jhuñjhlā kar burā ho ashk-bārī kā

ajab kyā hai ki qāsid bhuul jaa.e us kā le jaanā

likhūñ jis naame meñ shikva tirī ġhaflat-shi.ārī kā

misāl-e-naḳhl dekhā hai usī ko phūlte-phalte

kiyā jis shaḳhs ne hāsil tarīqa ḳhāksārī kā

har ik shai kā hai andāza magar pāyāñ nahīñ hargiz

tirī ġhaflat-shi.ārī kā mirī ummīd-vārī kā

zi-bas āñkhoñ meñ rañgat chhā rahī hai lāla-o-gul kī

ḳhizāñ meñ lutf aatā hai hameñ fasl-e-bahārī kā

kabhī sar paañv par rakhnā kabhī qurbān kah uThnā

hameñ thoḌā sā Dhab aatā to hai matlab-barārī kā

chhupā kal gosha-e-mai-ḳhāna meñ 'majrūh' ne dekhā

yūñhī shohra sunā thā shaiḳh kī parhez-gārī kā

na wo nalon ki shorish hai na ghul hai aah-o-zari ka

wo ab pahla sa hangama nahin hai be-qarari ka

talab kaisi bulana kya wahan KHud ja pahunchte hain

agar aalam yahi chande raha be-aKHtyari ka

wahan wo naz-o-ishwe se qadam gin gin ke rakhte hain

yahan is muntazir ka waqt pahuncha dam-shumari ka

kabhi chashm-e-KHumar-alud ki masti nahin dekhi

baja hai hazrat-e-naseh ko dawa hoshiyari ka

bhala kya aisi roti shakl pas aa kar koi baiThe

uThe aaKHir wo jhunjhla kar bura ho ashk-bari ka

ajab kya hai ki qasid bhul jae us ka le jaana

likhun jis name mein shikwa teri ghaflat-shiari ka

misal-e-naKHl dekha hai usi ko phulte-phalte

kiya jis shaKHs ne hasil tariqa KHaksari ka

har ek shai ka hai andaza magar payan nahin hargiz

teri ghaflat-shiari ka meri ummid-wari ka

zi-bas aankhon mein rangat chha rahi hai lala-o-gul ki

KHizan mein lutf aata hai hamein fasl-e-bahaari ka

kabhi sar panw par rakhna kabhi qurban kah uThna

hamein thoDa sa Dhab aata to hai matlab-barari ka

chhupa kal gosha-e-mai-KHana mein 'majruh' ne dekha

yunhi shohra suna tha shaiKH ki parhez-gari ka