نہ وہ تم ہو نہ وہ مسیحائی

نہ وہ تم ہو نہ وہ مسیحائی

یوں ہی سوچا تو آنکھ بھر آئی

اب وہ پہلی سی رونقیں بھی نہیں

نہ وہ پہلی سی ہے چمن آرائی

وقت پیری ہے ہو کا عالم ہے

سوئے محشر چلی ہے تنہائی

دل پر خوں کی یہ نمائش ہے

نو بہ نو یوں بہار ہے آئی

کیوں تری یاد بھی نہیں آتی

غم جاناں ہے تو بھی ہرجائی

کیسے کیسے گزر گئے موسم

دل سے جاتی رہی شکیبائی

کیوں مرے شہر آ گئے ہو تم

کیا ضروری ہے اب بھی رسوائی

بس کرو اب وضاحتیں برہمؔ

اس سے اچھی نہیں شناسائی