na ye badla na wo badla na ye dil ka jahan badla

na ye badlā na vo badlā na ye dil kā jahāñ badlā

agar badlā yahāñ kuchh to faqat vo mehrbāñ badlā

tumheñ bhī chain kī nīñdeñ yahāñ sone nahīñ deñgī

agar ajdād kā tum ne zarā sā bhī nishāñ badlā

zamāne meñ bahut aaya taġhayyur dosto lekin

zamīñ jaisī kī taisī hai na rang-e-āsmāñ badlā

abhī tak log qaa.em haiñ unhīñ jhūTī rivāyat par

tumhārī haq-bayānī se koī āḳhir kahāñ badlā

hamesha jis ke hoñToñ par mohabbat kī rahīñ bāteñ

ḳhudā jaane ki kyoñ us kā hai andāz-e-bayāñ badlā

qadam aage baḌhātā hī rahā maiñ saḳht rāhoñ par

na himmat hī mirī TuuTī na ye azm-e-javāñ badlā

hai un ko aaj bhī 'jāzil' vafādārī pe shak lekin

na ham ne shāḳh-e-gul chhoḌī na ham ne āshiyāñ badlā

na ye badla na wo badla na ye dil ka jahan badla

agar badla yahan kuchh to faqat wo mehrban badla

tumhein bhi chain ki ninden yahan sone nahin dengi

agar ajdad ka tum ne zara sa bhi nishan badla

zamane mein bahut aaya taghayyur dosto lekin

zamin jaisi ki taisi hai na rang-e-asman badla

abhi tak log qaem hain unhin jhuTi riwayat par

tumhaari haq-bayani se koi aaKHir kahan badla

hamesha jis ke honTon par mohabbat ki rahin baaten

KHuda jaane ki kyon us ka hai andaz-e-bayan badla

qadam aage baDhata hi raha main saKHt rahon par

na himmat hi meri TuTi na ye azm-e-jawan badla

hai un ko aaj bhi 'jazil' wafadari pe shak lekin

na hum ne shaKH-e-gul chhoDi na hum ne aashiyan badla