na ye puchhiye mujhse kya chahti hun

na ye pūchhiye mujh se kyā chāhtī huuñ

maiñ ik bevafā se vafā chāhtī huuñ

nazar saaf aa.e na tasvīr jis meñ

maiñ vo aa.ina toḌnā chāhtī huuñ

jo tanqīd karte haiñ merī vafā par

maiñ un se subūt-e-vafā chāhtī huuñ

kahīñ saath to chhoḌ deñge na merā

maiñ ye aap se pūchhnā chāhtī huuñ

zamāne ko hai chāñd tāroñ kī ḳhvāhish

magar maiñ tirī gard-e-pā chāhtī huuñ

karam par karam kyoñ haiñ logoñ ke mujh par

maiñ is baare meñ sūchnā chāhtī huuñ

nahīñ chāhiye mujh ko duniyā kī daulat

mohabbat kī dilkash fazā chāhtī huuñ

yaqīnan 'anā' mujh ko manzil milegī

buzurgoñ se apne duā chāhtī huuñ

na ye puchhiye mujh se kya chahti hun

main ek bewafa se wafa chahti hun

nazar saf aae na taswir jis mein

main wo aaina toDna chahti hun

jo tanqid karte hain meri wafa par

main un se subut-e-wafa chahti hun

kahin sath to chhoD denge na mera

main ye aap se puchhna chahti hun

zamane ko hai chand taron ki KHwahish

magar main teri gard-e-pa chahti hun

karam par karam kyon hain logon ke mujh par

main is bare mein suchna chahti hun

nahin chahiye mujh ko duniya ki daulat

mohabbat ki dilkash faza chahti hun

yaqinan 'ana' mujh ko manzil milegi

buzurgon se apne dua chahti hun