na ye puchho ki kya yaad aa raha hai

na ye pūchho ki kyā yaad aa rahā hai

mohabbat meñ ḳhudā yaad aa rahā hai

ḳhalish sī phir huī paidā jigar meñ

mujhe ik bevafā yaad aa rahā hai

hadoñ se baḌh chalī tūfāñ kī tezī

mujhe ab nāḳhudā yaad aa rahā hai

dil-e-be-mudda’ā āḳhir huā kyā

ġham-e-be-mudda'ā yaad aa rahā hai

bhare the jis meñ kuchh naġhmāt-e-ḳhāmosh

vo sāz-e-be-sadā yaad aa rahā hai

diye haiñ is qadar dhoke kisī ne

fareb-e-mudda'ā yaad aa rahā hai

mohabbat haañ mohabbat kā mujhe phir

vo vaqt-e-ibtidā yaad aa rahā hai

chamakte haiñ ye kyoñ āñkhoñ meñ aañsū

koī bhūlā huā yaad aa rahā hai

vo mahrūm-e-jafā 'bahzād' vo dil

vo mahrūm-e-jafā yaad aa rahā hai

na ye puchho ki kya yaad aa raha hai

mohabbat mein KHuda yaad aa raha hai

KHalish si phir hui paida jigar mein

mujhe ek bewafa yaad aa raha hai

hadon se baDh chali tufan ki tezi

mujhe ab naKHuda yaad aa raha hai

dil-e-be-mudda’a aaKHir hua kya

gham-e-be-mudda'a yaad aa raha hai

bhare the jis mein kuchh naghmat-e-KHamosh

wo saz-e-be-sada yaad aa raha hai

diye hain is qadar dhoke kisi ne

fareb-e-mudda'a yaad aa raha hai

mohabbat han mohabbat ka mujhe phir

wo waqt-e-ibtida yaad aa raha hai

chamakte hain ye kyon aankhon mein aansu

koi bhula hua yaad aa raha hai

wo mahrum-e-jafa 'bahzad' wo dil

wo mahrum-e-jafa yaad aa raha hai