na ye sahifon ka masala hai na ye aqidon ka masala hai

na ye sahīfoñ kā mas.ala hai na ye 'aqīdoñ kā mas.ala hai

ye mas.ala hai vahī jo karbal ke sab shahīdoñ kā mas.ala hai

ye qum kī masjid kā surḳh jhanDā hai das moharram kā hī tasalsul

isī liye to ye duniyā-bhar ke sabhī yazīdoñ kā mas.ala hai

jo chaudah sadiyoñ se har hisāb-o-kitāb par ham jhagaḌ rahe haiñ

ye diiñ ke daftar kī jārī-karda ġhalat rasīdoñ kā mas.ala hai

batā rahī hai mazār-e-murshid pe ab ye chilla-kashoñ kī mehnat

jo pahle murshid kā mas.ala thā vo ab murīdoñ kā mas.ala hai

sabhī ke muñh meñ zabāñ hai lekin kisī ke muñh meñ zabāñ nahīñ hai

ki haq-bayānī to sirf mujh se dahan-darīdoñ kā mas.ala hai

maiñ kohna-alfāz ke badan se na.e ma'ānī nikāltā huuñ

so merā uslūb shahr-e-fan ke sabhī jadīdoñ kā mas.ala hai

jo harf nāpāk haiñ unheñ vo barā.e-zar paak likh rahe haiñ

ye daur-e-hāzir ke nāqidoñ meñ ghuse palīdoñ kā mas.ala hai

vo jin kā har roz 'iid jaisā hai koī un ko batā.e 'vāsif'

ki muflisoñ ke gharoñ meñ bachchoñ kī donoñ ‘īdoñ kā mas.ala hai

na ye sahifon ka masala hai na ye 'aqidon ka masala hai

ye masala hai wahi jo karbal ke sab shahidon ka masala hai

ye qum ki masjid ka surKH jhanDa hai das moharram ka hi tasalsul

isi liye to ye duniya-bhar ke sabhi yazidon ka masala hai

jo chaudah sadiyon se har hisab-o-kitab par hum jhagaD rahe hain

ye din ke daftar ki jari-karda ghalat rasidon ka masala hai

bata rahi hai mazar-e-murshid pe ab ye chilla-kashon ki mehnat

jo pahle murshid ka masala tha wo ab muridon ka masala hai

sabhi ke munh mein zaban hai lekin kisi ke munh mein zaban nahin hai

ki haq-bayani to sirf mujh se dahan-daridon ka masala hai

main kohna-alfaz ke badan se nae ma'ani nikalta hun

so mera uslub shahr-e-fan ke sabhi jadidon ka masala hai

jo harf napak hain unhen wo barae-zar pak likh rahe hain

ye daur-e-hazir ke naqidon mein ghuse palidon ka masala hai

wo jin ka har roz 'id jaisa hai koi un ko batae 'wasif'

ki muflison ke gharon mein bachchon ki donon ‘idon ka masala hai