نہ زیر پا زمیں باندھو نہ سر پر آسماں باندھو

نہ زیر پا زمیں باندھو نہ سر پر آسماں باندھو

فقط ترک تمنا کی دلوں میں داستاں باندھو

لطافت پھر ملے گی کب حسیں رنگین شاموں کی

اسی نقطے پہ ٹھہرا ہے یہی دل کش سماں باندھو

بدلتی کچھ رتوں پر آس ہے بے کل مناظر کی

تم اپنی لذت حسن نظر کو درمیاں باندھو

بدن بھر اک تعلق چٹکیاں لینے لگے شاید

گزرتے خوش نما منظر کا عکس شادماں باندھو

جہان شوق کی پھر عشرت آوارگی لے کر

مچلتا دل ربا بے کل سرور جاوداں باندھو

بکھرتی دھول راہوں کی مچلتی جائے رہ رہ کر

مسافت کے جنوں میں یہ غبار کارواں باندھو

لطافت چاہتوں کی مسکراتی ہے فضاؤں میں

وہی چنچل حسیں دل کش حدیث دوستاں باندھو

نظر کے زاویوں سے ناپ لو یہ شوق کی دنیا

کوئی امید اہل حسن سے کیوں رائیگاں باندھو