na zinda na murda na duniya na din ka

na zinda na murda na duniyā na diiñ kā

mujhe tū ne zālim na rakkhā kahīñ kā

abas imtihāñ meñ lagāte ho vaqfa

bharosā hai kyā merī jān-e-hazīñ kā

mujhe ghar meñ gardish hai patlī kī sūrat

ye e.ajāz hai chashm-e-sehr-āfrīñ kā

purānā na fitna tire ghar se uTThā

nayā āsmāñ hai magar is zamīñ kā

kabhī mere tan meñ kabhī us ke ghar meñ

yahī shaġhl hai merī jān-e-hazīñ kā

ġhazab hai mirī us se takrār-e-va.ada

sitam hai jo mauqa.a milā ab nahīñ kā

sunā tū ne 'āqil' ajab raat guzrī

mohabbat kā mazkūr niklā kahīñ kā

na zinda na murda na duniya na din ka

mujhe tu ne zalim na rakkha kahin ka

abas imtihan mein lagate ho waqfa

bharosa hai kya meri jaan-e-hazin ka

mujhe ghar mein gardish hai patli ki surat

ye eajaz hai chashm-e-sehr-afrin ka

purana na fitna tere ghar se uTTha

naya aasman hai magar is zamin ka

kabhi mere tan mein kabhi us ke ghar mein

yahi shaghl hai meri jaan-e-hazin ka

ghazab hai meri us se takrar-e-wada

sitam hai jo mauqa mila ab nahin ka

suna tu ne 'aqil' ajab raat guzri

mohabbat ka mazkur nikla kahin ka