na-ashna-e-dil hai na-ashna-e-urdu

nā-āshnā-e-dil hai nā-āshnā-e-urdu

vo baat kyā karegā jis ko na aa.e urdu

tanhā na rah sakeñgī apne vatan meñ donoñ

urdu fidā-e-hindī hindī fidā-e-urdu

mil-jul ke donoñ bahneñ ai kaash baḌhtī jaa.eñ

himmat baḌhā.e hindī rasta dikhā.e urdu

mandir ho yā ki masjid girjā ho yā kalīsā

sab jagmagā rahe haiñ pā kar ziyā-e-urdu

'ġhālib' kī ye zamīñ hai sab par rahegī ġhālib

gūñjegī chāñd par bhī ik din sadā-e-urdu

'momin' kī dāstāñ hai 'mullā' kī tarjumāñ hai

'chakbast' kī zabāñ hai dekho navā-e-urdu

mashriq ho yā ki maġhrib ho asia ki europe

har ḳhitta-e-zamīñ par pahuñchī sadā-e-urdu

'tulsī' kī hai amānat 'ḳhusrav' kī hai virāsat

'rizvān' dekhnā tum miTne na paa.e urdu

na-ashna-e-dil hai na-ashna-e-urdu

wo baat kya karega jis ko na aae urdu

tanha na rah sakengi apne watan mein donon

urdu fida-e-hindi hindi fida-e-urdu

mil-jul ke donon bahnen ai kash baDhti jaen

himmat baDhae hindi rasta dikhae urdu

mandir ho ya ki masjid girja ho ya kalisa

sab jagmaga rahe hain pa kar ziya-e-urdu

'ghaalib' ki ye zamin hai sab par rahegi ghaalib

gunjegi chand par bhi ek din sada-e-urdu

'momin' ki dastan hai 'mulla' ki tarjuman hai

'chakbast' ki zaban hai dekho nawa-e-urdu

mashriq ho ya ki maghrib ho asia ki europe

har KHitta-e-zamin par pahunchi sada-e-urdu

'tulsi' ki hai amanat 'KHusraw' ki hai wirasat

'rizwan' dekhna tum miTne na pae urdu