ناآشنائے دل ہے ناآشنائے اردو

ناآشنائے دل ہے ناآشنائے اردو

وہ بات کیا کرے گا جس کو نہ آئے اردو

تنہا نہ رہ سکیں گی اپنے وطن میں دونوں

اردو فدائے ہندی ہندی فدائے اردو

مل جل کے دونوں بہنیں اے کاش بڑھتی جائیں

ہمت بڑھائے ہندی رستہ دکھائے اردو

مندر ہو یا کہ مسجد گرجا ہو یا کلیسا

سب جگمگا رہے ہیں پا کر ضیائے اردو

غالبؔ کی یہ زمیں ہے سب پر رہے گی غالب

گونجے گی چاند پر بھی اک دن صدائے اردو

مومنؔ کی داستاں ہے ملاؔ کی ترجماں ہے

چکبستؔ کی زباں ہے دیکھو نوائے اردو

مشرق ہو یا کہ مغرب ہو ایشیا کہ یورپ

ہر خطۂ زمیں پر پہنچی صدائے اردو

تلسیؔ کی ہے امانت خسروؔ کی ہے وراثت

رضوانؔ دیکھنا تم مٹنے نہ پائے اردو