na-ashna gar mujhse mere yar na hote

nā-āshnā gar mujh se mire yaar na hote

hālāt se ham aise to bezār na hote

is tarah mujhe aap ne chhoḌā nahīñ hotā

dāman meñ mire phuul the ye ḳhaar na hote

hote na zuleḳhā se ḳharīdār to shāyad

yūsuf ke liye misr ke bāzār na hote

kar detā agar ham pe ināyat kī nazar tū

phir terī nazar ke hī talabgār na hote

khalte na mujhe shām-o-sahar ke ye ujāle

jo jurm-e-mohabbat ke sazā-vār na hote

phir ishq meñ kartā na maiñ ehsās-e-nadāmat

tum jaise bhī hote pa jafā-kār na hote

ham ko bhī kahāñ shauq thā mai-ḳhvārī kā saaqī

gar ishq na hotā to yuuñ mai-ḳhvār na hote

har ḳhvāb kī ta.abīr hī ho jaatī mukammal

ham kaash tire ishq meñ bedār na hote

afsurda sā dariyā thā to kyā chāhte sāhil

ham vo the shanāvar jo kabhī paar na hote

hote na sadaf 'qalb' tirī aañkh ke ḳhālī

palkoñ pe agar abr-e-guhar-bār na hote

na-ashna gar mujh se mere yar na hote

haalat se hum aise to bezar na hote

is tarah mujhe aap ne chhoDa nahin hota

daman mein mere phul the ye KHar na hote

hote na zuleKHa se KHaridar to shayad

yusuf ke liye misr ke bazar na hote

kar deta agar hum pe inayat ki nazar tu

phir teri nazar ke hi talabgar na hote

khalte na mujhe sham-o-sahar ke ye ujale

jo jurm-e-mohabbat ke saza-war na hote

phir ishq mein karta na main ehsas-e-nadamat

tum jaise bhi hote pa jafa-kar na hote

hum ko bhi kahan shauq tha mai-KHwari ka saqi

gar ishq na hota to yun mai-KHwar na hote

har KHwab ki tabir hi ho jati mukammal

hum kash tere ishq mein bedar na hote

afsurda sa dariya tha to kya chahte sahil

hum wo the shanawar jo kabhi par na hote

hote na sadaf 'qalb' teri aankh ke KHali

palkon pe agar abr-e-guhar-bar na hote