نا آزمودہ حرف تھے بے حال ہو گئے

نا آزمودہ حرف تھے بے حال ہو گئے

سر تا بہ پا نوشتۂ اعمال ہو گئے

پہلا ورق الٹنے کی مہلت کہاں ملی

دو ہی حروف جان کا جنجال ہو گئے

ملنا ملانا شکر و شکایت محبتیں

یارو وہ عہد رفتہ کے احوال ہو گئے

نکلا تھا لعل پوش جزیروں کی کھوج میں

اب یہ خبر بھی آئے کئی سال ہو گئے

برتاؤ موسموں کا بہت منصفانہ تھا

رستے بھی ان کے ساتھ ہی پامال ہو گئے

پیلی ہوا کا زور ابھی کچھ گھٹا نہیں

اڑتے ہوئے وہ آئے تھے بے بال ہو گئے

وہ جسم کیا تھے برف کے پیکر تمام تھے

میں نے چھوا تو ساعقہ تمثال ہو گئے