نا خدا کو جب خدا کا آسرا ملتا نہیں

نا خدا کو جب خدا کا آسرا ملتا نہیں

عمر بھر اس کو کناروں کا پتا ملتا نہیں

عزم و ہمت ہو تو ہر اک راستہ نظروں میں ہے

کون سی منزل ہے جس کا راستہ ملتا نہیں

حادثوں نے غم کے افسانے مرتب کر دئے

اب کتاب زندگی میں حادثہ ملتا نہیں

اہل باطن کی عنایت بھی ضروری ہے بہت

اہل ظاہر کے ملائے سے خدا ملتا نہیں

کچھ نہ کچھ اپنائیت نظروں میں ہونی چاہئے

اجنبی نظروں کو صورت آشنا ملتا نہیں

جذب سانسوں میں مری یہ کون آخر ہو گیا

اب مری پہچان اب میرا پتہ ملتا نہیں

حسن ہر تعمیر کا قائم ہے میری ذات میں

میں وہ مٹی ہوں مجھے چھانو تو کیا ملتا نہیں

زندگی وقف خیال دوست ہے اپنی ضمیرؔ

اب کسی گوشے میں احساس انا ملتا نہیں