نامکمل حادثے کو یوں مکمل کر دیا

نامکمل حادثے کو یوں مکمل کر دیا

آنکھ کی جنبش سے اس نے مسئلہ حل کر دیا

کس نے یوں گلزار کی نظموں کے جادو کی طرح

اک نظر دیکھا مجھے اور پل میں بیکل کر دیا

نیند کے زندان میں رہنے دیا ہے خواب کو

آنکھ کھولی اور دل کا در مقفل کر دیا

اس نے منت مان کر پازیب پھینکی اک طرف

پاؤں پانی میں رکھا دریا کو دلدل کر دیا

جانے کس کی یاد کا موتی گرا رخسار پر

دل کی اس بنجر زمیں کو پل میں جل تھل کر دیا

باغ میں بکھری ہے خوشبو کی طرح تازہ خبر

منچلی تتلی نے اک بھنورے کو پاگل کر دیا

اب چمک لوٹے گی اس کو دیکھنے کے بعد ہی

اک جھلک کی چاہ نے آنکھوں کو کاجل کر دیا

زندگی تو اور کیا تھی چلچلاتی دھوپ تھی

میری امی کی دعا نے سر پہ بادل کر دیا

نازیہؔ بس نام تھا اور نام بھی بس عام سا

اس ادھورے نام کو اس نے مکمل کر دیا