na-mukammal hadse ko yun mukammal kar diya

nā-mukammal hādse ko yuuñ mukammal kar diyā

aañkh kī jumbish se us ne mas.ala hal kar diyā

kis ne yuuñ gulzār kī nazmoñ ke jaadū kī tarah

ik nazar dekhā mujhe aur pal meñ bekal kar diyā

niiñd ke zindān meñ rahne diyā hai ḳhvāb ko

aañkh kholī aur dil kā dar muqaffal kar diyā

us ne mannat maan kar pāzeb pheñkī ik taraf

paañv paanī meñ rakhā dariyā ko daldal kar diyā

jaane kis kī yaad kā motī girā ruḳhsār par

dil kī is banjar zamīñ ko pal meñ jal-thal kar diyā

baaġh meñ bikhrī hai ḳhushbū kī tarah taaza ḳhabar

manchalī titlī ne ik bhauñre ko pāgal kar diyā

ab chamak lauTegī us ko dekhne ke baa'd hī

ik jhalak kī chaah ne āñkhoñ ko kājal kar diyā

zindagī to aur kyā thī chilchilātī dhuup thī

merī ammī kī du'ā ne sar pe bādal kar diyā

'nāziya' bas naam thā aur naam bhī bas 'aam sā

is adhūre naam ko us ne mukammal kar diyā

na-mukammal hadse ko yun mukammal kar diya

aankh ki jumbish se us ne masala hal kar diya

kis ne yun gulzar ki nazmon ke jadu ki tarah

ek nazar dekha mujhe aur pal mein bekal kar diya

nind ke zindan mein rahne diya hai KHwab ko

aankh kholi aur dil ka dar muqaffal kar diya

us ne mannat man kar pazeb phenki ek taraf

panw pani mein rakha dariya ko daldal kar diya

jaane kis ki yaad ka moti gira ruKHsar par

dil ki is banjar zamin ko pal mein jal-thal kar diya

bagh mein bikhri hai KHushbu ki tarah taza KHabar

manchali titli ne ek bhaunre ko pagal kar diya

ab chamak lauTegi us ko dekhne ke ba'd hi

ek jhalak ki chah ne aankhon ko kajal kar diya

zindagi to aur kya thi chilchilati dhup thi

meri ammi ki du'a ne sar pe baadal kar diya

'naziya' bas nam tha aur nam bhi bas 'am sa

is adhure nam ko us ne mukammal kar diya