na-munasib hai KHafa nalon ko sun kar hona

nā-munāsib hai ḳhafā nāloñ ko sun kar honā

abhī aayā hī nahīñ tum ko sitamgar honā

hai sitam kā ye karam aah nahīñ karte ham

varna āsān na thā sabr kā ḳhūgar honā

nahīñ rahtī koī rok ahl-e-junūñ ke aage

koī dīvār ho shaq ho ke use dar honā

ro paḌā maiñ bhī pasījā jo vo but nāloñ par

qābil-e-rahm hai insān kā patthar honā

aa ke samjhā.e vo taskīn kā pahlū ham ko

maan leñge dil-e-betāb kā patthar honā

gor meñ dafn kiyā jab na ruke zindāñ meñ

kis tarah dekhte dīvānoñ kā be-ghar honā

qissa-e-tūr-o-kalīm aap sunāte haiñ fuzūl

nahīñ mumkin jo tajallī kā mukarrar honā

chhoḌ kar dā.ira-e-haq ko na jaa.e 'rāġhib'

kufr hai silsila-e-shaiḳh se bāhar honā

na-munasib hai KHafa nalon ko sun kar hona

abhi aaya hi nahin tum ko sitamgar hona

hai sitam ka ye karam aah nahin karte hum

warna aasan na tha sabr ka KHugar hona

nahin rahti koi rok ahl-e-junun ke aage

koi diwar ho shaq ho ke use dar hona

ro paDa main bhi pasija jo wo but nalon par

qabil-e-rahm hai insan ka patthar hona

aa ke samjhae wo taskin ka pahlu hum ko

man lenge dil-e-betab ka patthar hona

gor mein dafn kiya jab na ruke zindan mein

kis tarah dekhte diwanon ka be-ghar hona

qissa-e-tur-o-kalim aap sunate hain fuzul

nahin mumkin jo tajalli ka mukarrar hona

chhoD kar daira-e-haq ko na jae 'raghib'

kufr hai silsila-e-shaiKH se bahar hona