na-tawan ishq ne aaKHir kiya aisa hum ko

nā-tavāñ ishq ne āḳhir kiyā aisā ham ko

ġham uThāne kā bhī baaqī nahīñ yaarā ham ko

dard-e-furqat se tire zo.af hai aisā ham ko

ḳhvāb meñ bhī tire dushvār hai aanā ham ko

josh-e-vahshat meñ ho kyā ham ko bhalā shukr-e-libās

bas kifāyat hai junūñ dāman-e-sahrā ham ko

rahbarī kī dahan-e-yār kī jānib ḳhat ne

ḳhizr ne chashma-e-haivān ye dikhāyā ham ko

dil girā us ke zanaḳhdāñ meñ fareb-e-ḳhat se

chaah ḳhas-posh thā ai vaa.e na sūjhā ham ko

vaah kāhīdgī-e-jism bhī kyā kaam aa.ī

bazm meñ the pa raqīboñ ne na dekhā ham ko

qālib-e-jism meñ jaañ aa ga.ī goyā 'shiblī'

mo.ajaza fikr ne apnī ye dikhāyā ham ko

na-tawan ishq ne aaKHir kiya aisa hum ko

gham uThane ka bhi baqi nahin yara hum ko

dard-e-furqat se tere zoaf hai aisa hum ko

KHwab mein bhi tere dushwar hai aana hum ko

josh-e-wahshat mein ho kya hum ko bhala shukr-e-libas

bas kifayat hai junun daman-e-sahra hum ko

rahbari ki dahan-e-yar ki jaanib KHat ne

KHizr ne chashma-e-haiwan ye dikhaya hum ko

dil gira us ke zanaKHdan mein fareb-e-KHat se

chah KHas-posh tha ai wae na sujha hum ko

wah kahidgi-e-jism bhi kya kaam aai

bazm mein the pa raqibon ne na dekha hum ko

qalib-e-jism mein jaan aa gai goya 'shibli'

moajaza fikr ne apni ye dikhaya hum ko