na-umidi ki baat mat karna

nā-umīdī kī baat mat karnā

zaa.e.a apnī hayāt mat karnā

ġhairat-e-dil kā ye taqāzā hai

din ko taslīm raat mat karnā

kaise kah doge zehn-e-ādam se

fikr-e-kul-kā.enāt mat karnā

chāñdnī meñ nahā.e phūloñ ko

nazr-e-tārīk raat mat karnā

dasht mere junūñ ko kahtā hai

merī vus.at ko maat mat karnā

ek muddat ke baad soyā huuñ

zor se koī baat mat karnā

be-zamīroñ kī zaat meñ shāmil

'nāz' tū apnī zaat mat karnā

na-umidi ki baat mat karna

zaea apni hayat mat karna

ghairat-e-dil ka ye taqaza hai

din ko taslim raat mat karna

kaise kah doge zehn-e-adam se

fikr-e-kul-kaenat mat karna

chandni mein nahae phulon ko

nazr-e-tarik raat mat karna

dasht mere junun ko kahta hai

meri wusat ko mat mat karna

ek muddat ke baad soya hun

zor se koi baat mat karna

be-zamiron ki zat mein shamil

'naz' tu apni zat mat karna