na-umidi ne lahu dil ka baha rakkha hai

nā-umīdī ne lahū dil kā bahā rakkhā hai

ab mire dāman-e-ehsās meñ kyā rakkhā hai

rāh-e-pur-nūr ke bhaTke hue kuchh tāroñ ne

saare māhaul ko tārīk banā rakkhā hai

mere nazdīk qayāmat ke sivā kuchh bhī nahīñ

tū ne jo ziist kā mafhūm batā rakkhā hai

terī ma.asūm umangoñ ko baḌī muddat se

merī āñkhoñ ne gunahgār banā rakkhā hai

terī rahmat ke sahāroñ ne ḳhudāvand-e-karīm

ġharq hone se safīne ko bachā rakkhā hai

phir bhī ik jashn-e-tarab dil meñ rachā letā huuñ

go mujhe gardish-e-daurāñ ne satā rakkhā hai

merī ġhurbat ne mire fan kā uḌāyā hai mazāq

terī daulat ne tirā aib chhupā rakkhā hai

maiñ ne dekhā hai isī baat ke parde meñ sukūt

tū ne jis baat pe kohrām machā rakkhā hai

kaise phir ho na nigāhoñ meñ muravvat kī jhalak

dil jo iḳhlās kī kirnoñ se sajā rakkhā hai

apnī taqdīs pe yuuñ shaiḳh-e-haram mat itrā

maiñ ne bhī parcham-e-tauhīd uThā rakkhā hai

na-umidi ne lahu dil ka baha rakkha hai

ab mere daman-e-ehsas mein kya rakkha hai

rah-e-pur-nur ke bhaTke hue kuchh taron ne

sare mahaul ko tarik bana rakkha hai

mere nazdik qayamat ke siwa kuchh bhi nahin

tu ne jo zist ka mafhum bata rakkha hai

teri masum umangon ko baDi muddat se

meri aankhon ne gunahgar bana rakkha hai

teri rahmat ke sahaaron ne KHudawand-e-karim

gharq hone se safine ko bacha rakkha hai

phir bhi ek jashn-e-tarab dil mein racha leta hun

go mujhe gardish-e-dauran ne sata rakkha hai

meri ghurbat ne mere fan ka uDaya hai mazaq

teri daulat ne tera aib chhupa rakkha hai

main ne dekha hai isi baat ke parde mein sukut

tu ne jis baat pe kohram macha rakkha hai

kaise phir ho na nigahon mein murawwat ki jhalak

dil jo iKHlas ki kirnon se saja rakkha hai

apni taqdis pe yun shaiKH-e-haram mat itra

main ne bhi parcham-e-tauhid uTha rakkha hai