nachiz bhi KHuban se mulaqat mein gum hai

nāchīz bhī ḳhūbāñ se mulāqāt meñ gum hai

majzūb zarā sair-e-maqāmāt meñ gum hai

kyā sham.a jalātā hai ki ai daulat-e-shab-e-tāb

kal sub.h kā sūraj to tirī gaat meñ gum hai

khulte hī nahīñ lams pe us jism ke asrār

sayyāh ajab shahr-e-tilismāt meñ gum hai

maiñ Duub gayā jab tire paikar meñ to TuuTā

ye vahm ki tū ḳhud hī mirī zaat meñ gum hai

yā husn hī is shahr meñ kāfir nahīñ hotā

yā ishq yahāñ izzat-e-sādāt meñ gum hai

nachiz bhi KHuban se mulaqat mein gum hai

majzub zara sair-e-maqamat mein gum hai

kya shama jalata hai ki ai daulat-e-shab-e-tab

kal subh ka suraj to teri gat mein gum hai

khulte hi nahin lams pe us jism ke asrar

sayyah ajab shahr-e-tilismat mein gum hai

main Dub gaya jab tere paikar mein to TuTa

ye wahm ki tu KHud hi meri zat mein gum hai

ya husn hi is shahr mein kafir nahin hota

ya ishq yahan izzat-e-sadat mein gum hai