nadan hain wahin jinko adawat si lage hai

nādāñ haiñ vahīñ jin ko 'adāvat sī lage hai

ham ko tirī har baat 'ināyat sī lage hai

shikva sā lage hai na shikāyat sī lage hai

us lab pe har ik baat mohabbat sī lage hai

kis kis ko tirī aaḌ meñ sab luuT rahe haiñ

ye to hameñ be-nām siyāsat sī lage hai

behtar hai tire sāmne ham lab hī na kholeñ

har baat tujhe aaj shikāyat sī lage hai

kahte haiñ tumheñ ab nahīñ ehsās kisī kā

ye baat hameñ ik na.ī tohmat sī lage hai

ik moḌ pe tū ne jo mirā saath diyā thā

har moḌ pe ab terī rifāqat sī lage hai

tapte hue sahrā meñ kahāñ chain jigar ko

haañ sāya-e-dāman meñ to rāhat sī lage hai

shāyad mirā ehsās hī sab kuchh hai ki duniyā

sahrā sī lage hai kabhī jannat sī lage hai

phūloñ kī mahak hai na shagūfoñ kī latāfat

phailī huī har-sū tirī nik.hat sī lage hai

kyā kahiye 'hayāt' aaj hai vo daur-e-junūñ-ḳhez

chehre pe har ik fard ke vahshat sī lage hai

nadan hain wahin jin ko 'adawat si lage hai

hum ko teri har baat 'inayat si lage hai

shikwa sa lage hai na shikayat si lage hai

us lab pe har ek baat mohabbat si lage hai

kis kis ko teri aaD mein sab luT rahe hain

ye to hamein be-nam siyasat si lage hai

behtar hai tere samne hum lab hi na kholen

har baat tujhe aaj shikayat si lage hai

kahte hain tumhein ab nahin ehsas kisi ka

ye baat hamein ek nai tohmat si lage hai

ek moD pe tu ne jo mera sath diya tha

har moD pe ab teri rifaqat si lage hai

tapte hue sahra mein kahan chain jigar ko

han saya-e-daman mein to rahat si lage hai

shayad mera ehsas hi sab kuchh hai ki duniya

sahra si lage hai kabhi jannat si lage hai

phulon ki mahak hai na shagufon ki latafat

phaili hui har-su teri nikhat si lage hai

kya kahiye 'hayat' aaj hai wo daur-e-junun-KHez

chehre pe har ek fard ke wahshat si lage hai