نادان و کم نگاہ رہا بے کمال میں

نادان و کم نگاہ رہا بے کمال میں

قرطاس زندگی پہ بنا اک سوال میں

دعوت کنایہ کوئی اشارہ نہ التفات

دامن کو تھامنے کی کروں کیا مجال میں

مصروفیت نے کچھ بھی کہاں سوچنے دیا

ہر شخص کو گلہ کہ ہوا ہوں محال میں

رہتا ہے عجلتوں میں کہ آیا چلا گیا

بیٹھے کبھی تو اس سے کہوں دل کا حال میں

ہم جسم کی حدود سے آگے نکل گئے

میری وہ کلپنا ہے تو اس کا خیال میں

حد سے سوا بڑھا ہے تمنا کا بار جب

آپ اپنے واسطے ہی ہوا ہوں وبال میں

تم ہی دیا کرو گے حوالے مرے ندیمؔ

شعر و سخن کی ایسی بنوں گا مثال میں