nadan-o-kam-nigah raha be-kamal main

nādān-o-kam-nigāh rahā be-kamāl maiñ

qirtās-e-zindagī pe banā ik savāl maiñ

dāvat kināya koī ishāra na iltifāt

dāman ko thāmne kī karūñ kyā majāl maiñ

masrūfiyat ne kuchh bhī kahāñ sochne diyā

har shaḳhs ko gila ki huā huuñ muhāl maiñ

rahtā hai ujlatoñ meñ ki aaya chalā gayā

baiThe kabhī to us se kahūñ dil kā haal maiñ

ham jism kī hudūd se aage nikal ga.e

merī vo kalpanā hai to us kā ḳhayāl maiñ

had se sivā baḌhā hai tamanna kā baar jab

aap apne vāste hī huā huuñ vabāl maiñ

tum hī diyā karoge havāle mire 'nadīm'

sher-o-suḳhan kī aisī banūñgā misāl maiñ

nadan-o-kam-nigah raha be-kamal main

qirtas-e-zindagi pe bana ek sawal main

dawat kinaya koi ishaara na iltifat

daman ko thamne ki karun kya majal main

masrufiyat ne kuchh bhi kahan sochne diya

har shaKHs ko gila ki hua hun muhaal main

rahta hai ujlaton mein ki aaya chala gaya

baiThe kabhi to us se kahun dil ka haal main

hum jism ki hudud se aage nikal gae

meri wo kalpana hai to us ka KHayal main

had se siwa baDha hai tamanna ka bar jab

aap apne waste hi hua hun wabaal main

tum hi diya karoge hawale mere 'nadim'

sher-o-suKHan ki aisi banunga misal main