nafe hai kuchh to wo kisi faizan hi ka hai

naafe hai kuchh to vo kisī faizān hī kā hai

varna ta.alluqā mirā nuqsān hī kā hai

kulfat hai sab kī sab ye tavaqqo ke naam kī

jo bhī kiyā dharā hai ye imkān hī kā hai

māl-o-manāl dast-gah-e-hādsāt kā

rahte haiñ gar bahāl to ausān hī kā hai

manzar vo hai ki jo kabhī shashdar na kar sake

hairat ye hai ki dīda-e-hairān hī kā hai

ilzām ḳhud huuñ maiñ yahāñ hastī ke naam par

merā vajūd asl meñ bohtān hī kā hai

tafsīl meñ to simTā huā hī thā inkisār

ijmāl bhī ye ijz ke unvān hī kā hai

āḳhir ayaañ huā ki marāsim kī zail meñ

asbāb-e-dil-shikastagī paimān hī kā hai

jab tak ba-dosh rahtā hai rahtā huuñ gāmzan

merā safar haqīqatan sāmān hī kā hai

utre vo nāv-e-shauq se ho Dūbnā jise

sāhil mizāj-e-bahr kā tūfān hī kā hai

āvārgāñ ke vāste kirdār dasht kā

anjām-kār hīta-e-zindān hī kā hai

jā-e-panāh us kī koī dūsrī nahīñ

'ḳhāvar' kahīñ kā hai to bayābān hī kā hai

nafe hai kuchh to wo kisi faizan hi ka hai

warna talluqa mera nuqsan hi ka hai

kulfat hai sab ki sab ye tawaqqo ke nam ki

jo bhi kiya dhara hai ye imkan hi ka hai

mal-o-manal dast-gah-e-hadsat ka

rahte hain gar bahaal to ausan hi ka hai

manzar wo hai ki jo kabhi shashdar na kar sake

hairat ye hai ki dida-e-hairan hi ka hai

ilzam KHud hun main yahan hasti ke nam par

mera wajud asl mein bohtan hi ka hai

tafsil mein to simTa hua hi tha inkisar

ijmal bhi ye ijz ke unwan hi ka hai

aaKHir ayan hua ki marasim ki zail mein

asbab-e-dil-shikastagi paiman hi ka hai

jab tak ba-dosh rahta hai rahta hun gamzan

mera safar haqiqatan saman hi ka hai

utre wo naw-e-shauq se ho Dubna jise

sahil mizaj-e-bahr ka tufan hi ka hai

aawargan ke waste kirdar dasht ka

anjam-kar hita-e-zindan hi ka hai

ja-e-panah us ki koi dusri nahin

'KHawar' kahin ka hai to bayaban hi ka hai