nakaam walwalon ko liye bhagte rahe

nākām valvaloñ ko liye bhāgte rahe

ham sar pe daldaloñ ko liye bhāgte rahe

nādīda manziloñ kī taraf ham tamām umr

hājat ke qāfiloñ ko liye bhāgte rahe

vo ḳhauf thā ki dard kā ehsās hī na thā

talvoñ meñ ābloñ ko liye bhāgte rahe

fursat kahāñ thī dafn kareñ mayyatoñ ko ham

bas murda hausloñ ko liye bhāgte rahe

chhoḌā nahīñ unheñ unheñ hal bhī nahīñ kiyā

ham sirf mas.aloñ ko liye bhāgte rahe

pahle tamām shahroñ ko jañgal sifat kiyā

phir sar pe jañgaloñ ko liye bhāgte rahe

nakaam walwalon ko liye bhagte rahe

hum sar pe daldalon ko liye bhagte rahe

nadida manzilon ki taraf hum tamam umr

hajat ke qafilon ko liye bhagte rahe

wo KHauf tha ki dard ka ehsas hi na tha

talwon mein aablon ko liye bhagte rahe

fursat kahan thi dafn karen mayyaton ko hum

bas murda hauslon ko liye bhagte rahe

chhoDa nahin unhen unhen hal bhi nahin kiya

hum sirf masalon ko liye bhagte rahe

pahle tamam shahron ko jangal sifat kiya

phir sar pe jangalon ko liye bhagte rahe