naKHuda ki mushkilen aasan kar jata hun main

nāḳhudā kī mushkileñ āsān kar jaatā huuñ maiñ

apnī kashtī aap jab tūfāñ se Takrātā huuñ maiñ

un kā har ik qaul aksar be-amal paatā huuñ maiñ

nāsehoñ kī baat ko ḳhātir meñ kab laatā huuñ maiñ

kis qadar hai nā-rasā merā muqaddar dekhiye

ain manzil ke qarīb aa kar bhaTak jaatā huuñ maiñ

har balāe-e- nā-gahāñ merā muqaddar ban ga.ī

har balā se ḳhud ko ab mahfūz-tar paatā huuñ maiñ

jab mohabbat jaan thī īmān thī vo din ga.e

ab mohabbat ke tasavvur se bhī ghabrātā huuñ maiñ

be tire jo kuchh guzartī hai mire dil par na pūchh

zindagī ko maut ke nazdīk-tar paatā huuñ maiñ

maiñ tirī bātoñ meñ aa kar be-sar-o-sāmāñ huā

ab magar ai dil tirī bātoñ meñ kab aatā huuñ maiñ

muddateñ guzrīñ ki dil ne kī thī un kī aarzū

aaj tak dasht-e-talab meñ Thokareñ khātā huuñ maiñ

zindagī meñ rang-o-bū ne kis qadar dhoke diye

is pe bhī aasī fareb-e-rañg-o-bū khātā huuñ maiñ

naKHuda ki mushkilen aasan kar jata hun main

apni kashti aap jab tufan se Takraata hun main

un ka har ek qaul aksar be-amal pata hun main

nasehon ki baat ko KHatir mein kab lata hun main

kis qadar hai na-rasa mera muqaddar dekhiye

ain manzil ke qarib aa kar bhaTak jata hun main

har balae-e- na-gahan mera muqaddar ban gai

har bala se KHud ko ab mahfuz-tar pata hun main

jab mohabbat jaan thi iman thi wo din gae

ab mohabbat ke tasawwur se bhi ghabraata hun main

be tere jo kuchh guzarti hai mere dil par na puchh

zindagi ko maut ke nazdik-tar pata hun main

main teri baaton mein aa kar be-sar-o-saman hua

ab magar ai dil teri baaton mein kab aata hun main

muddaten guzrin ki dil ne ki thi un ki aarzu

aaj tak dasht-e-talab mein Thokaren khata hun main

zindagi mein rang-o-bu ne kis qadar dhoke diye

is pe bhi aasi fareb-e-rang-o-bu khata hun main