nala-e-azurdagan hun mahshar-e-fariyaad hun

nāla-e-āzurdagāñ huuñ mahshar-e-fariyād huuñ

log jis ko sun nahīñ sakte maiñ vo uftād huuñ

jism kahtā hai mujhe zanjīr kā halqa samajh

ruuh kahtī hai ki maiñ āzād huuñ āzād huuñ

is giraftārī kī muddat dekhiye kab ḳhatm ho

aap hī qaidī huuñ maiñ aur aap hī sayyād huuñ

raunaqeñ pāmāl merī sard hangāme mire

shahr meñ bhī huuñ magar vīrān huuñ barbād huuñ

chand rishte haiñ jo mujh se aaj tak vābasta haiñ

aa.ine bhūle hue haiñ pattharoñ ko yaad huuñ

gardish-e-ayyām kī āñkhoñ kā taara huuñ sharīf

taḳhta-e-mashq-e-sitam huuñ hāsil-e-bedād huuñ

ai 'sharīf' apnī ḳhushī bhī us ke ġham kī den hai

jo mujhe ġham de ke ḳhush hai us ke ġham meñ shaad huuñ

nala-e-azurdagan hun mahshar-e-fariyaad hun

log jis ko sun nahin sakte main wo uftad hun

jism kahta hai mujhe zanjir ka halqa samajh

ruh kahti hai ki main aazad hun aazad hun

is giraftari ki muddat dekhiye kab KHatm ho

aap hi qaidi hun main aur aap hi sayyaad hun

raunaqen pamal meri sard hangame mere

shahr mein bhi hun magar viran hun barbaad hun

chand rishte hain jo mujh se aaj tak wabasta hain

aaine bhule hue hain pattharon ko yaad hun

gardish-e-ayyam ki aankhon ka tara hun sharif

taKHta-e-mashq-e-sitam hun hasil-e-bedad hun

ai 'sharif' apni KHushi bhi us ke gham ki den hai

jo mujhe gham de ke KHush hai us ke gham mein shad hun