نالۂ دل نکل نہ جائے کہیں

نالۂ دل نکل نہ جائے کہیں

شان ہستی بدل نہ جائے کہیں

سر بالیں وہ کر گئے احساں

مرنے والا سنبھل نہ جائے کہیں

فوق پر بھی نظر ضروری ہے

تحت میں دل بہل نہ جائے کہیں

ہیں بہت اہل شوق صف بستہ

حسن کا وار چل نہ جائے کہیں

ہو ادھر بھی نگاہ پیر مغاں

ساعت فیض ٹل نہ جائے کہیں

ہو جہاں میں ہی سر کسی صورت

فکر عہد ازل نہ جائے کہیں

رہئے ثابت قدم گناہ سہی

رائیگاں ہر عمل نہ جائے کہیں

مستقل ہوش چاہئے ساقیؔ

آج کی بات کل نہ جائے کہیں