nala-e-dil nikal na jae kahin

nāla-e-dil nikal na jaa.e kahīñ

shān-e-hastī badal na jaa.e kahīñ

sar-e-bālīñ vo kar ga.e ehsāñ

marne vaalā sañbhal na jaa.e kahīñ

fauq par bhī nazar zarūrī hai

tahat meñ dil bahal na jaa.e kahīñ

haiñ bahut ahl-e-shauq saf-basta

husn kā vaar chal na jaa.e kahīñ

ho idhar bhī nigāh pīr-e-muġhāñ

sā.at-e-faiz Tal na jaa.e kahīñ

ho jahāñ meñ hī sar kisī sūrat

fikr-e-ahd-e-azal na jaa.e kahīñ

rahiye sābit-qadam gunāh sahī

rā.egāñ har 'amal na jaa.e kahīñ

mustaqil hosh chāhiye 'sāqī'

aaj kī baat kal na jaa.e kahīñ

nala-e-dil nikal na jae kahin

shan-e-hasti badal na jae kahin

sar-e-baalin wo kar gae ehsan

marne wala sanbhal na jae kahin

fauq par bhi nazar zaruri hai

tahat mein dil bahal na jae kahin

hain bahut ahl-e-shauq saf-basta

husn ka war chal na jae kahin

ho idhar bhi nigah pir-e-mughan

saat-e-faiz Tal na jae kahin

ho jahan mein hi sar kisi surat

fikr-e-ahd-e-azal na jae kahin

rahiye sabit-qadam gunah sahi

raegan har 'amal na jae kahin

mustaqil hosh chahiye 'saqi'

aaj ki baat kal na jae kahin